Stefnir gefur út ófjárhagslegar upplýsingar í sjálfbærniskýrslu sinni í annað skiptið árið 2022 og vill með því hvetja aðra til að gera hið sama og stuðla að gagnsærri upplýsingagjöf varðandi þá mikilvægu þætti sem umhverfi, félagslegir þættir og stjórnarhættir eru í starfsemi félagsins. Stefnir vinnur skráningu ófjárhagslegra upplýsinga eftir UFS viðmiðum NASDAQ.

Stefnir fær upplýsingar vegna umfangs 2 og 3 frá Klöppum en þær eru reiknaðar miðað við hlutfall starfsfólks í lok árs innan höfuðstöðva Arion banka þar sem Stefnir er til húsa. Í ófjárhagslegri upplýsingagjöf félagsins 2021 var losunin reiknuð sem hlutfall þeirra fermetra sem Stefnir nýtir undir starfsemi sína í höfuðstöðvum bankans og er því um breytingu á aðferð að ræða milli ára. Gögn sem snúa að mannauði koma úr mannauðskerfi móðurfélags Stefnis og gögn sem snúa að stjórnarháttum byggja á stjórnarháttayfirlýsingu Stefnis. Ófjárhagslegar upplýsingar hafa verið endurskoðaðar og staðfestar með takmarkaðri vissu af endurskoðunarfyrirtækinu Deloitte.

Árangur á árinu 2022

Á árinu 2022 var stofnaður nýr sjóður, Stefnir – Sustainable Arctic Fund sem einblínir á hlutabréfa fjárfestingar á Norðurslóðum með sjálfbærni að leiðarljósi. Einnig var KF Global Equity, erlendur sjóður í stýringu Stefnis, skilgreindur samkvæmt grein 8 (Article 8) í reglugerð Evrópuþingsins og ráðsins um upplýsingagjöf tengda sjálfbærni á sviði fjármálaþjónustu (e. SFDR). Sjóðurinn upplýsir þannig um hvernig tekið er tillit til áhrifa á sjálfbærni í fjárfestingarákvörðunum sínum og er þetta fyrsti sjóður í stýringu innlends aðila sem hefur skilgreint sig með þessum hætti.

Stefnir stofnaði þrjá sjóði sem taka sérstaklega mið af sjálfbærni á árinu 2021 og félagið hefur verið leiðandi í framboði á sjóðum á sviði ábyrgra fjárfestinga (UFS-sjóðum). Sjóðirnir eru „Stefnir -Scandinavian Fund - ESG“, „Stefnir – Sjálfbær skuldabréf“ og „Stefnir – Grænaval“. Stefnir – Scandinavian Fund ESG hefur hlotið AAA-einkunn MSCI, þá hæstu sem veitt er og er hann fyrstur íslenskra sjóða til að hljóta þessa einkunn. Sjóðurinn er þar með kominn í flokk með fremstu sjóðum í heiminum með tilliti til UFS þátta. Í greiningu MSCI kemur fram að „Stefnir – Scandinavian Fund ESG“ mælist ofar en 94% sjóða sem MSCI veitir einkunn, en þeir eru um 34 þúsund talsins á heimsvísu.

Stefnur um sjálfbærni og ábyrgar fjárfestingar 

Stefna um sjálfbærni og samfélagslega ábyrgð var samþykkt af stjórn í upphafi árs 2022. Stefnan lýsir sjálfbærniáherslum Stefnis til lengri tíma og hvernig félagið tileinkar sér sjálfbærni í starfsemi sinni og við stýringu fjármuna samkvæmt umboðsskyldu félagsins. Stefnuna má finna á heimasíðu Stefnis. Félagið hefur einnig sett sér stefnu um ábyrgar fjárfestingar. Stefnan miðar að því að stýra fjármunum í eigu viðskiptavina með hagsmuni þeirra að leiðarljósi út frá umhverfisþáttum, félagslegum þáttum og stjórnarháttum. 

Ófjárhagslegir lykilmælikvarðar Stefnis

• G2. Óhæði stjórnar: Óháðir stjórnarmenn voru tveir á móti einum háðum stjórnarmanni á árinu 2021.
• G5. Siðareglur birgja: Allir birgjar skulu upplýstir um siðareglur birgja umfram ákveðin fjárhæðarmörk.
• G6. Siðferði og aðgerðir gegn spillingu: Stjórn samþykkti siðareglur árið 2021 sem endurspegla þau siðferðisviðmið sem stjórn og starfsmenn vinna eftir en önnur viðmið um sama efni má einnig finna í ráðningasamningum starfsfólks, stefnu um hagsmunaárekstra og starfsreglum stjórnar. Stjórn samþykkti einnig reglur Stefnis um aðgerðir gegn peningaþvætti og fjármögnun hryðjuverka árið 2020.
• G7. Persónuvernd: Stefnir hefur sett sér stefnu um persónuvernd sem sjá má á heimasíðu félagsins.
• S4. Kynjafjölbreytni: Hlutfall kvenna í störfum í efsta starfsmannalagi var 40% á árinu 2021 en innan fyrirtækisins var hlutfall kvenna 30%. Markmið stjórnar um aukna fjölbreytni lýtur að því hlutfall kvenna meðal starfsfólks félagsins verði 40% í lok árs 2024.

Samþykkt af stjórn Stefnis
17. febrúar 2022

Ófjárhagslegar upplýsingar Stefnis 2022

Álit Deloitte með takmarkaðri vissu