Stefn­ir – Arð­greiðslu­sjóð­ur greið­ir arð til sjóð­fé­laga í þriðja sinn

Stefnir – Arðgreiðslusjóður greiðir arð til sjóðfélaga í þriðja sinn

Stefnir - Arðgreiðslusjóður hs. greiðir í dag út arð til 822 sjóðfélaga sjóðsins og nam arðgreiðsluhlutfall 26,8 kr. á hlut eða 23,5% af heildarstærð sjóðsins. Sjóðurinn er sá eini sinnar tegundar hér á landi sem greiðir uppsafnaðar arðgreiðslur til sjóðfélaga einu sinni á ári.Arðgreiðslur félaga í eigu sjóðsins voru óvenju miklar þetta árið og munar þar mest um arðgreiðslur frá Origo vegna sölu á Tempo og frá Símanum vegna sölu á Mílu. Arðgreiðslur vegna þessara tveggja félaga telja tæplega 90% af öllum arði til sjóðsins á nýliðnu arðgreiðslutímabili.

Helstu kostir Stefnis – Arðgreiðslusjóðs

1. Sjóðurinn býður upp á að kaupa í félögum sem sögulega hafa greitt arð í einu.

2. Útgreiðsla arðs er einu sinni á ári.

3. Að eiga í Stefni - Arðgreiðslusjóði auðveldar gerð á skattskýrslu þar sem ekki þarf að færa inn kaup og sölur í einstökum félögum og færa marga arðmiða.

4. Auðvelt er að stýra því hvernig arðgreiðslan er greidd til hlutdeildarskírteinishafa.

Stefnir - Arðgreiðslusjóður er ólíkur hefðbundnum hlutabréfasjóðum að því leyti að arður er greiddur til hlutdeildarskírteinishafa. Félögin sem sjóðurinn á í ráðstafa afkomu sinni að einhverju leyti með greiðslu til hluthafa í formi arðgreiðslna. Því fær sjóðurinn greiddan arð sem hann svo skilar til hlutdeildarskírteinishafa á hverju ári.Sjóðurinn fjárfestir í félögum sem hafa sögulega greitt arð og/eða eru líkleg til að greiða arð innan 12 mánaða. Sjóðurinn tekur fyrst og fremst stöður í hlutabréfum íslenskra hlutafélaga og hlutafélaga með starfsemi á Íslandi, sem skráð eru í NASDAQ OMX Nordic Iceland, First North markaðnum, eða annarri viðurkenndri kauphöll eða markaðstorgi fjármálagerninga.Hagnaður af innlausn hlutdeildarskírteina sjóðsins er skattskyldur á Íslandi og fer um skattskyldu hagnaðar samkvæmt lögum um tekjuskatt nr. 90/2003 og staðgreiðslu samkvæmt lögum nr. 94/1996, um staðgreiðslu skatts á fjármagnstekjur. Um frekari skattlagningu getur verið að ræða. Fjármagnstekjuskattur reiknast þegar hlutdeildarskírteini eru seld með hagnaði eða þegar arður er greiddur af hlutdeildarskírteinum. Varðandi aðila búsetta í öðrum löndum en á Íslandi er athygli vakin á að kanna hvort um sé að ræða skattlagningu umfram þá sem er á Íslandi.

Hvenær fæ ég arðinn?

Arður er greiddur seinasta dag júnímánaðar ár hvert og er hann greiddur á vörslusafn eiganda. Hægt er að fá arðinn greiddan sjálfkrafa á bankareikning og má finna upplýsingar um ferlið undir spurt og svarað.

Þarf ég að eiga í sjóðnum í heilt ár?

Nei, allir sem eiga hlutdeildarskírteini í Stefni – Arðgreiðslusjóði í dagslok þann 28. júní fá greiddan arð á seinasta degi júnímánaðar.